Карамоко Дембеле потекнува од Брегот на Слоновата Коска и тренира фудбал во великанот од „Селтик парк“. Важи за негов бисер и ако е седмооделенец веќе е на сениорскиот праг во „зелено-белиот“ тим
Се вика Карамоко Дембеле. Потекнува од Брегот на Слоновата Коска и тренира фудбал во Селтик. Има само 13 години, се издвојува од врсниците и за него велат дека е бисер на шкотскиот премиерлигаш од Глазгов. Но, дека ќе стигне до, речиси, прагот на сениорскот тим на таа возраст никој и не можеше да предвиди. Туку што зачекори во тинејџерскиот период од животот, а веќе може да се каже дека е дел од фудбалската историја.
Малиот сонародник на Дидие Дрогба, на Јаја Туре од земјата на африканскиот запад го привлече вниманието на планетарната фудбалска јавност и се најде во спортските рубрики на сите светски медиуми. Дембеле дебитира за тимот на Селтик за играчи до 20 години што впрочем претставува резервен состав на „зелено-белиот“ клубот од „Селтик парк“.
Деби на таа возраст за тим од тој ранг не е секојдневие во фудбалскиот свет. Медиумите пишуваат дека досега се нема случено толку младо момче да заигра биде во ист состав со дотолку повозрасни фудбалери од кои најголем дел се полнолетни и практично сениори.
Зидан: Тренерите и родителите не смеат да оптоваруваат со приказни за големи работи на таа возраст
Со коментар по дебито на бисерот на Селтик се јави Зинедин Зидан. Фудбалската легенда на француската репрезентација и на Реал Мадрид чиј тренер е во моментот упати поучна порака во контекст на случајот на Дембеле.
„Со децата е потребен внимателен и поинаков пристап. Тоа е мое лично мислење. Некој што има 13 години треба да си игра, да ужива во фудбалот, да ги научи основните работи. Меѓутоа, пред се, добро да се забавува, да склопува познанства, да стекнува пријателства“, вели популарниот „зизу“
и продолжи:
„Прерано е да се поставуваат цели пред некој што има 13 или 14 години, прерано е пред момчиња на таа возраст да се говори за кариера, за големи работи. Децата мора да го сакаат фудбалот и да уживаат во него. Може да фантазираат да станат професионални фудбалери, но тренерите и родителите никако не смеат да ги оптоваруваат со такви приказни“.