„Како може вака да ги злоупотребуваат стари лица, За ова да го направиш треба да немаш душа, ова е изживување врз старите лица“, се дел од коментарите под фотографија направена во домот за стари лица во Неготино „Жана“. На фотографијата се гледаат стари лица, некои и во инвалидски колички, а на себе имаат шалчиња од партијата ВМРО-ДПМНЕ, додека веднаш до нив стои градоначалникот на Неготино, Ванчо Апостолов и кандидатката за пратеник на партијата Павлинче Честојнова.
Градоначалникот за НОВА вели дека во посета на домот бил како член на политичка партија заедно со кандидатката за пратеник и дека никој на сила на граѓаните не им поделил рекламен материјал.
„И кога нема и кога има избори ние одиме во посета на домот. Јас таму бев како претставник на мојата политичка партија со кандидатката за пратеничка. Граѓаните сами си побараа рекламен материјал и активистите кои беа со нас им поделија. Нема ништо лошо во тоа, не знам зошто опозицијата сака да ја изврти целата приказна. Ние имаме одлична соработка со сите институции и фирми во Македонија, рекламен материјал делиме само на оние што сакаат, не правиме ништо погрешно ниту на сила. А со старите лица се фотографиравме на нивно барање“, вели градоначалникот на Неготино.
Од домот денеска не добивме одговор, иако неколку пати телефонски ја баравме директорката Снежана Илова, и ни посочија прашањата да им ги испратиме по електронска пошта, со тоа што одговор НОВА ќе добиела до утре.
Ивана Стојановска, претседател на здружението за меѓугенерациска солидарност „Доблест“, вели не е страшно тоа што лицата биле фотографирани со шалчиња и маички од ВМРО-ДПМНЕ, затоа што најверојатно би се фотографирале и со рекламен материјал од друга политичка партија.
„Ние не би заземале страна за објавувањето на сликата, доколку тоа било посета на Градоначалникот кој претпоставувам е од ВМРО, им бил поделен рекламен материјал, тие ги облекле маичките, тоа не мора да значи дека тие се симпатизери на таа партија. Доколку друга партија дојде во посета на домот, и подели рекламен материјал сигурно ќе се постапат исто. Право на директорката е дали ќе дозволи фотографирање на лицата што се сместени таму. Ние лично не би ја критикувале директорката затоа што се работи за исклучителна жена која што ги сака старите лица. Покрај толку проблеми со кои се соочуваат старите лица, ние не би се фатиле за маичките кои ги облекле“, вели Стојановска.