Трошоците на животот во март годинава се зголемени за 0,2 отсто во споредба со претходниот месец, а за ист процент се намалени цените на мало. На годишно ниво, односно во споредба со март 2019 година, трошоците на животот бележат пораст од 0,5 отсто, а цените на мало пораснале за 0,3 проценти.
Според податоците на Државниот завод за статистика, пораст на трошоците на животот во март 2020 година, во споредба со претходниот месец, е забележан кај свежото и разладеното овошје за 7,2 отсто, цигарите за 4,1 отсто, маслото и маснотиите за 3,4 отсто, шеќерот, џемот, медот, чоколадата и кондиторските производи за 0,9 отсто, јајцата за 0,8 отсто, месото и млекото за 0,7 отсто, лебот и житата, сирењето и урдата, свежиот и разладениот зеленчук, освен компирот и другите коренести плодови, за 0,4 отсто, жестоките пијалаци и виното за 0,3 отсто и прехранбените производи неспоменати на друго место за 0,2 отсто.
Пораст на трошоците на животот е забележан и кај производите за лична хигиена за 1,3 отсто, игрите и играчките за 0,9 отсто, моторните возила за 0,8 отсто, малите електрични апарати за домаќинство за 0,5 отсто, мебелот, покуќнината и фармацевтските производи за 0,4 отсто, големите електрични апарати за домаќинство за 0,3 отсто, другите медицински производи, домашните миленици и сродни производи за 0,2 отсто.
Намалување на трошоците на животот има кај рибата и морските плодови, сувото овошје и јаткастите плодови за 0,4 отсто, сушениот зеленчук, другиот конзервиран и преработен зеленчук за 0,2 отсто.
Намалување на трошоците на животот е забележано и кај течните горива за домаќинствата за 10,2 отсто, горивата и мазивата за сопствените превозни средства за 7,8 отсто, телефонската и телефакс опремата за 2,9 отсто, гасот за домаќинствата за 2,8 отсто, воздухопловниот патнички транспорт за 1,8 отсто, итн.