Расправата за статусот на Охридскиот регион во УНЕСКО се очекува да се најде на дневeн ред на 44-та годишна Сесија на Комитетот за светско наследство при Организација на ОН за образование, наука и култура што ќе се одржи денеска во кинескиот град Фуџоу.
Охридскиот регион, како заштитено природно и културно наследство од исклучителна универзална вредност, е шеста точка на дневниот ред во работата на Комитетот, па одлуката по нацрт-извештајот и идниот статус на заштитеното културно и природно наследство се очекува да биде познат во текот на денот.
Што се однесува на нацрт-верзијата на самата одлука, во неа се нотираат слабостите за односот на државата, за институциите, за властите на национално и локално ниво кон Охридското Езеро и градот Охрид како природно, односно културно наследство прогласени за светско богатство и несоодветниот одговор на државата и институциите по забелешките нотирани од Светската организација, со конкретен предлог регионот да биде впишан на Листата на УНЕСКО со светски богатства во опасност.
Претходно, 34 организации и граѓански здруженија од Северна Македонија и Албанија испратија писмо до Комитетот за светско наследство во кое од УНЕСКО се бара Охридскиот регион да биде впишан на листата на светски наследства во опасност.
Епилогот од денешната расправа е извесен. Голема е веројатноста Охрид и езерото да бидат поместени на листата светски вредности во опасност. Тоа не значи нивно бришење од листата на заштитени природни и културни вредности на УНЕСКО, туку очекувана разврска на она на што беше укажувано години наназад од страна на експертите и критичката јавност, како несоодветно однесување кон брендот признаен од светот. Дел од експертите сè уште се на став дека можеби тоа е вистинскиот начин што ќе отвори повеќе можности за државата, за институциите и за градот да добијат помош, искуства и механизми на Светската организација во наредните активности за надминување на проблемите што впрочем и доведоа до сегашната состојба.