Ниту полната сала, ниту поддршката од трибините, ниту желбата за победа и силните мотиви не беа доволни за ракометарите на Вардар за триумф над Барселона во седмото коло во групата А во Лигата на шампиони. Ако „црвено-црните“ на своја страна ги имаа индиректните моменти, Каталонците на своја страна ги имаа директните услови за победничко расположение на крајот за конечни 30:26 (полувреме 13:9).
„Заслужена победа на Барселона во што придонесовме и ние со играта. Почнавме со негатива и завршивме во негатива, а со толку грешки колку што направивме е невозможно да дојдете до позитивен резултат“, беше коментарот на Стоилов по мечот по вториот пораз на Вардар во ЛШ во оваа сезона по оној на гостувањето кај Кјелце.
Нивната одбрана беше цврста како гранит, а сигурност им влеваше и голманот Гонзало Перез де Варгас кој нанижа седум интервенции и прими само девет гола во првиот дел. Ритамот што го наметнаа од првата минута го држеа во текот на целиот натпревар и немаа проблеми за безбедно да го приведат до крај.
Вардарци пак беа се што Барселона не беше. Грешеа во додавањата, тешко градеа позиција за удар, промашуваа и сето како резултат, веројатно, на согорувањето во намерата за победа и издвојување на чело на табелата. Можност за поправен, барем на впечатокот, ќе имаат веќе наредниот викенд против истиот ривал во неговата „Блауграна“ (сабота, 19 ч.).
„Ние одигравме под нивото, Барселона беше одлична. На поразот влијаеја големиот број на технички грешки што ги направивме. Се боревме, но тоа не беше доволно бидејќи за победа над екипата каква што е Барса е потребно и грешките да се сведат на минимум“, истакна вардаровиот тренер, Роберто Гарсија Парондо по средбата.
Најзабележителен поединец на средбата беше Дика Мем, стрелец на осум гола за гостите од Шпанија, по четири додадоа Лудовик Фабрегас и Каспер Мортенсен. Вардар беше предводен од Тимур Дибирив кој го заврши мечот со шест реализации, една повеќе од Даинис Кристопанс, четири даде Иван Чупиќ. Отсечен во нападот беше Стојанче Стоилов.
Лига на шампиони, 7 коло
Група А
Вардар – Барселона 26:30
Кристијанстад – Веспрем 32:29
Мешков Брест – Кјелце 26:35
Рајн Некар Левен – Монпелје 37:27
Табела: Барселона 12, Рајн Некар Левен 10, Кјелце 10, Вардар 10, Веспрем 6, Мешков Брест 4, Кристијанбстад 3, Монпелје 1.
Група Б
Скјерн – ПИК Сегед 26:29
ППД Загреб – Целје 24:22
ПСЖ – Фленсбург 29:28
Табела: ПСЖ 14, ПИК Сегед 12, Нант 7, Фленсбург 6, Скјерн 5, ППД Загреб 5, Целје 4, Мотор Запорожје 3.
Група Ц
Татран Прешов – Бешикташ 27:23
Чеховски Медведди – Бјерингбро 24:30
Металирг – Спортинг Лисабон 24:31
Табела: Бјерингбро 12, Спортинг Лисабон 10, Татран Прешов 10, Чеховски Медведи 4, Бешикташ 4, Металург 2.
Група Д
Рихимаен Кокс – Вакер Тун 31:29
Висла Плоцк – Елверум 30:28
Динамо Букурешт – Адемар Леон 35:30
Табела: Висла Плоцк 10, Динамо Букурешт 10, Адемар Леон 9, Елверум 8, Рихимаен Кокс 4, Вакер Тун 1.