НАТО секогаш ќе го одбере патот што води кон надеж, демократија и мир, а не оној што води кон страв и војна, порача генералниот секретар на Алијансата, Јенс Столтенберг во видео-обраќање на сесијата „Мир и демократија наспроти војна и автократија“ во рамките на Преспа форумот за дијалог во Струга.
Во обраќањето Столтенберг говореше за Договорот од Преспа чие потпишување овозможи членство на Македонија во НАТО и кој што придонесе за добрососедски односи, а истовремено ја отвори иднината на земјава.
Според него, договорите како Преспанскиот се важен дел од меѓународниот поредок заснован врз правила, а таквите договори ја обезбедуваат слободата, овозможуваат напредок, отвораат перспективна иднина.
„Алтернативата на тоа е катастрофа, како што можеме да видиме во Украина. Руската инвазија врз Украина го уништи мирот низ Европа и темелно ја промени нашата споделена безбедност. Кога и да заврши војната во Украина, односите со Москва драматично се променети, а безбедносниот пејзаж во Европа никогаш повеќе нема да биде ист“, рече Столтенберг.
Зајакнувањето на руско-кинеските односи го нарече „предизвик за нашата безбедност, нашите интереси и вредности“, а Македонија ја пофали како валиден сојузник, кој придонесува во мировната мисија во Косово која е од витално значење за безбедноста на Западниот Балкан, особено во време на зголемени тензии.
„Изминатите неколку дена нашата мисија на КФОР ја зајакнавме со стотици трупи, а Северна Македонија го зголеми буџетот за одбрана и дава поддршка на нашиот партнер Украина. НАТО може да смета на Северна Македонија и обратно. Јасен показател се авионите на НАТО кои во рамки на патролната служба го контролираат небото над земјата“, рече Столтенберг.
На оваа сесија се обратија и претседателот Стево Пендаровски, потоа претседателот на Хрватска, Зоран Милановиќ, претседателот на Црна Гора, Јаков Милатовиќ и на Албанија, Бајрам Бегај.