Прогласена е кризна состојба и зголемени се силите и на Армијата и на полицијата на јужната граница. Државата нема да дозволи влез на мигранти, бидејќи тоа е политика и на сите држави во целиот регион, изјави денеска премиерот Оливер Спасовски. Запрашан дали Владата има план во врска со мигрантите по изјавата на српскиот претседател, Александар Вучиќ за херметичко затворање на границата, Спасовски рече дека е очигледно оти транзитот повеќе не е опција.
„Знаете дека имаме веќе прогласено кризна состојба, дека се зголемени силите и на Армијата и на полицијата на јужната граница. На основа на сите информации што ги добиваме од нашите служби, од партнерските служби се следи ситуацијата. Сега засега е стабилно, немаме никакво зголемување на мигранти кои би можеле да се обидат да влезат на територијата на Република Северна Македонија, меѓутоа, ставот е дека ќе имаме нулта толеранција, изјави Спасовски.
Тој потсети дека државата досега имала политика во која што мигрантите само транзитираа низ нашата територија и дека имаме само два транзитни центри, како и дека државата својата политика во однос на мигрантската криза ја градела на две основи.
„Едната основа е европската политика во делот на справување со мигранти и втората, регионалната соработка, односно политика која што е заедничка на државите во регионот. Бидејќи нема справување со каков било мигрантски бран ако сите заедно не носиме заеднички ставови, одлуки и не соработуваме меѓу себе“, изјави Спасовски.