Француската полиција го опколи напаѓачот, кој во престрелка во Стразбур, во близина на божиќниот базар, уби најмалку четири лица, а повредени се 11, изјави за медиумите извор близок до истрагата. Шестмина од повредените се во сериозна здравствена состојба.
Се работи за околу 350 припадници на полицијата кои се во потрага по убиецот.
Нивото на безбедност во градот е подигнато на „опасност од напад“.
Напаѓачот е идентификуван како 29-годишен маж, а неговиот стан во областа Нојдорф претходно бил претресен во рамки на истрагата за грабеж извршен летото, при што се пронајдени гранати.
Постои сомнеж дека напаѓачот е екстремист, но мотивот се уште не е утврден.
Париското обвинителство ќе почне истрага за во пукањето во центарот на Стразбур како за терористички напад.
Обвинител, кој е задолжен за противтерористички истраги, ќе допатува во Стразбур, соопшти неговата канцеларија.
Министерот за внатрешни работи, Кристоф Кастанер, додаде дека напаѓачот претходно и бил познат на полицијата и имал досие. Локалните власти велат дека тој од порано го свртел на себе вниманието на разузнавачките служби.
Европскиот Парламент утрово продолжи нормално со работа по вчерашниот напад во центарот на градот.
-По вчерашниот тажен настан, ве информирам дека враќањето во Европскиот Парламент е безбедно и дека нормалните активности продолжуваат, напиша на Твитер портпаролот на ЕП, Хауме Дух.
Европскиот Парламент оваа недела е во пленарен состав во Стразбур. Повеќе стотини пратеници, асистенти, стажанти и новинари го полнат градот секој месец за време на пленарните седници. Зградата на Парламентот синоќа беше затворена, а луѓето спречени да излезат од неа.
Градоначалникот на Стразбур објави ден на жалост по нападот во градот.