Интересно е дека во тужбата учествувале само неколку новинари, претежно оние со критичен глас, но не и нивните колеги кои на таканаречениот црн понеделник заедно со нив беа исфрлени од собранието по што следеше и тепање на пратеници од опозицијата од страна на полициски сили за кои никој никогаш не објасни како влегле во парламентот.
Европскиот суд за човекови права пресуди во корист на новинарите кои на 24 декември 2012 година, објави Академик. Судот заклучил дека во предметот постои повреда на членовите 10 и 6 од Европската конвенција за човекови права.
Како што стои во образложението на судот, новинарите Насер Селмани, Наташа Стојановска, Фросина Факова, Снежана Лупевска, Билјана Богдановска и Тони Ангеловски се жалеле пред ЕСЧП за нивното насилно отстранување од собраниската галерија, од која како акредитирани новинари ја следеле дебатата за носењето на Буџетот на 24 декември 2012 година.
Во барањето се наведува дека правото на примање и пренесување на информации е интегрален дел од слободата на изразување и правото на јавно информирање го опфаќало и правото на медиумите непречено да ја извршуваат својата дејност и да ја информираат јавноста.
ЕСЧП образложува дека носењето на Буџетот во 2012 година беше проследено со тензија помеѓу власта и опозицијата, а атмосферата на оваа седница, кулминираше откако опозициски пратеници го опкружија претседателот на Собранието, кој му нареди на обезбедувањето да го осигури редот во законодавниот дом.
Следејќи ја наредбата, обезбедувањето од собраниската сала ги отстрани опозициските пратеници, но и новинарите од собраниската галерија, вклучувајќи ги и новинарите жалители во Стразбур.