Стиховите на Ацо Шопов беа оживеани со синоќа во Народниот театар Штип со несекојдневен сценски настан. Овој сценко-музички полифоничен колаж насловен како „Молитви на моето тело“ креиран според циклусот „Молитви на моето тело“ од збирката „Небиднина“ на Ацо Шопов, публиката со искрениот аплауз го воздигна на уште повисоко ниво аџилакот на молитвите на великиот поет од градот под Исарот.
Од сценскиот настап инспириран од стиховите на Ацо Шопов – Суад Беговски Сухи (десно), Енес Беговски (лево)
Искусните актери Рујиш Беговска и Суад Беговски Сухи заедно со младиот талентиран музичар Енес Беговски , движејќи се низ сопственото сценско патешествие, ја повлекоа и публиката да тргне по сопствено патешествие, секој сам за себе.
Од сценскиот настап инспириран од стиховите на Ацо Шопов – Рујиш Беговска
„Додека сношти на сцена ги живеевме молитвите на Ацо Шопов имав чувство дека тој, поетот, некаде од духовните височини го слуша ехото на молитвите (негови, наши, сечии), раѓањето на зборот…го слуша раѓањето на љубовта“, рече авторот на овој перформанс Суад Беговски Сухи.
Од сценскиот настап инспириран од стиховите на Ацо Шопов – Енес Беговски
Атмосферата во Штип може да се опише како ретко волшебно доживување, кое за миг ја поврза публиката со длабоките стихови на големиот поет.
Од сценскиот настап инспириран од стиховите на Ацо Шопов – Енес Беговски
„Непретенциозно, ова поетско-музичко патешествие беше нешто што не се пропушта. Доживување кое исконски и продорно ве води низ длабоките “тонови” од животот враќајќи ве на себе и кон себе. Од почеток до крај не ви дава да трепнете, ниту за миг да избегате од ова “раѓање”. Раѓање на зборот, раѓање на секое ваше сетило. Секој збор на Ацо Шопов, секој музички тон и звук силно удира како капка во длабок бунар и долго после перформансот одѕвонува во вашите уши.
Вака актерски и музички оживеан стихот на големиот поет е потврда за големината на неговите стихови и големината на актерите кои го живеат секој изговорен збор во моментот, сега и тука. А музиката и звуците се посебна поетика, поетика сама за себе, која само го крева зборот на едно високо ниво, кое само по себе е редок миг. Кога ќе речат, ретки се тие мигови во животот, мигови кои никој не успеал да ги опише и објасни со збор. Вакви мигови вчера доживеавме бескрајно многу. Свесноста за тие мигови е исто така реткост“, вели Теа Беговска.
