Денеска во Кривичниот суд во Скопје почнува судскиот процес за организаторите на насилствата во Собранието од 27 април во 2017 година. Под обвинение во предметот се поранешниот претседател на Собранието, Трајко Вељаноски, ексминистрите за транспорт и врски и за образование, Миле Јанакиески и Спиро Ристовски, како и поранешниот директор на УБК, Владимир Атанасовски. Тие се товарат дека сториле кривично дело „терористичко загрозување на уставниот поредок и безбедноста“.
Според Основното Јавно Обвинителство (ОЈО), осомничените на почетокот на 2017 година подготвиле и реализирале план со намера да оневозможат мирно примопредавање на власта. За таа цел, ги организирале и материјално ги поддржале масовните протести, најпрво пред Државната изборна комисија (ДИК), а потоа и протестите на движењето „За заедничка Македонија“ што кулминираа со насилно влегување во Собранието на 27 април.
„Осомничените како организатори ја вклучиле севкупната партиска структура и материјални средства за исполнување на целта и овозможиле континуирано намалување на бројот на полициски службеници за обезбедување на протестите. Со намера да го загрозат уставниот поредок и безбедноста, критичниот ден организирале непречено влегување на народните маси во законодавниот дом, вклучиле патриотски здруженија и ангажирале лица за извршување на насилство. Воедно, од седиштето на политичка партија континуирано го мобилизирале членството на партијата од Скопје и другите градови. Во исто време, еден од осомничените со возило, сопственост на Управата за безбедност и контраразузнавање, донел огнено оружје и панцирни елеци пред Собранието на Република Македонија што биле наменети за лица што протестираат и имаат искуство во ракување со оружје. Со овие активности осомничените предизвикале чувство на несигурност, загрозување и страв кај граѓаните“, се наведува во обвинението од ОЈО.
Во истрагата беа опфатени и поранешниот премиер Никола Груевски и ексразузнавачот Никола Бошковски, но постапката за нив е запрена додека не станат достапни на органите на прогон.
Судењето ќе го води судечки совет во кој прв судија е Илија Трпков, а втора судијка е Дијана Груевска-Илиевска, која дојде на местото на Владимир Туфегчиќ. Кога предметот беше распореден според АКМИС-системот, Туфегчиќ беше втор судија и веднаш бараше изземање кое претседателот на судот, Иван Џолев, го одби. Меѓутоа, тој испрати и второ барање до Џолев, а стигнало и известување од обвинителството, со наводи дека ќерка на судијата Ивана Туфегчиќ, како тогашна пратеничка, давала исказ за настаните од 27 април и поднела отштетно побарување.