Судска победа на Рафаел Надал. Шпанскиот тенисер ја тужеше и ја доби Розалин Башело, поранешна министерка за спорт на Франција, за клевета дека користел допинг во текот на кариерата. Таа го загуби процесот и ќе мора да плати 12.000 евра отштета на моментно водечкиот на АТП ранг листата.
„Како што можете да слушнете денеска е среќен ден за мене, за мојот тим и за моите фанови“, рече Надал.
Башело заврши на суд по изнесените обвинувања на адреса на Надал дека користел допинг во 2013 година што, според неа, било причина да паузира седум месеци. Сопственикот на 16 гренслем титули возврати со тужба бидејќи, како што рече, му била нанесена штета.
„Целта на тужбата е јавните личности да не изнесуваат навреди, клевети и лажни обвинувања на сметка на спортистите без ниту еден доказ и згора на тоа да останат неказнети“, додаде шпанскиот тениски ас од Мајорка кој сумата од пресудата вети дека ќе ја донира во некоја од хуманитарните организации во Франција.
И тоа не беше се. Пред поведување на судска постапка, Надал побара од Интернационалната тениска федерација (ИТФ) да ги објави сите резултати од неговите допинг контроли. Притоа нагласи дека бил принуден да поднесе тужба затоа што Башело немала никакви докази, а по основ на обесштетување побара 100.000 евра.