Министерот за транспорт и врски, Горан Сугарески на денешната прес-конференција истакна дека не очекува никакви проблеми во делот на исплатата на средства кон компаниите.

„Работодавачите и компаниите не треба воопшто да бидат загрижени, бидејќи има доволно средства и преку кредитните линии, но, се разбира, и преку буџетот. Не очекувам во ниеден случај заради средствата кој било проект да биде попречен од она што е согласно Планот за јавни набавки“, рече Сугарески.

Министерот нема информации дека се отпуштаат градежни работници.

„Знам дека фирмите работат на тоа, можеби некаде со понамалена, позабавена динамика заради целокупната ситуација, меѓутоа немам сознанија дека градежни работници се отпуштаат“, истакна Сугарески.

Во однос на акцизата на горивата, потенцира дека зголемувањето за три денари е антикризна мерка, а не мерка за да им се направи дополнителен товар на граѓаните.

„Внесувањето на акцизата не е желба на некого, ниту пркос или надменост што сака Владата да ја покаже. Тоа е неопходност. Цената на нафтата во изминатиот период не се сеќавам да била на пониско ниво. Цената е 20 денари помала од декември, јануари, февруари и дел од од почетокот на март. Не може да стане збор за некаков голем потрес, зголемување. Ако ја гледаме акцизата дополнително како дел од горивото многу јасно е дека никаде нема помала акциза од овде. Собраните средства од оваа акциза ќе се користат за граѓаните, здравствените работници, за сите граѓани, за МВР, за сите што се вклучени во борбата со коронавирусот“, истакна министерот.

Запрашан за ставот на ресорното Министерството по најавата за протестот на транспортетите, Сугарески нагласи дека секој има демократско право да протестира и дека нивните барања може да ги достават до Владата.