Јужноамериканскиот клупски фудбалски шампион за 2018 година ќе биде прогласен на европско тло. Реванш мечот во финалето во Копа Либертадорес меѓу Ривер Плата и Бока јуниорс ќе се одигра на 9 декември (20.30 ч. по средноевропско време) на „Сантијаго Бернабеу“ во Мадрид. Раководството на КОНМЕБОЛ (Фудбалска конфедерација на Јужна Америка) на состанокот во Парагвај во вторникот реши одложеното Суперкласико на градските ривали од Буенос Аирес да се организира надвор од Аргентина, но не прецизира каде.
За потенцијални градови домаќини на финалето во Копа Либертадорес се споменуваа Доха, Мајами, Милано, Џенова, Абу Даби и престолнини во Јужна Америка како Асунсион (Парагвај), Лима (Перу) и Сантијаго (Чиле), но и бразилски Бело Хоризонте. Одлуката, сепак, падна на главниот град на Шпанија за што, според првиот човек на КОНМЕБОЛ, Алехандро Домингеш, пресудни фактори биле јазикот, аргентинската колонија на Пиринеите и големиот број на летови меѓу Буенос Аирес и Мадрид.
Во реваншот двете екипи ќе влезат со 2:2 од првата средба на стадионот „Бонбоњера“. Возвратниот дуел што требаше да се одигра на „Монументал“ стадионот беше одложен по нападот на навивачи на Ривер Плата врз клупскиот автобус на Бока јуниорс.