Златан Ибрахимовиќ е казнет со неиграње на три натпревари поради насилничко однесување, соопшти Фудбалската асоцијација (ФА) на Англија. Против шведскиот интернационалец е поднесена тужба за удирање на Тајрон Мингс со лакт за време на саботниот натпревар на Манчестер јунајтед против Борнмут на „Олд трафорд“, реакција што следуваше откако беше згазнат по главата.
Напаѓачот на „црвените ѓаволи“ по мечот тврдеше дека противничкиот фудбалер налетал на неговиот лак, но подоцна одлучи да не се бори против тужбата и да почне со отслужување на казната.
По ова, менаџерот Жозе Мурињо останува без услугите на Ибрахимовиќ против Челзи во четврт-финалето во ФА купот и во премиерлигашките дуели со Мидлсборо и ВБА. Враќање во тимот е најавено за натпреварот со Ростов во Лига Европа.
Англиската ФА поднесе тужба и против Мингс кој, пак, донесе спротивна одлука од онаа на Ибрахимовиќ. Играчот на Борнмут ќе ја обжали одлуката на дисциплинците во Асоцијацијата иако тие сметаат дека неговиот престап е потежок од потегот на Швеѓанецот и бараат поостра казна од три меча.