Американецот Џастин Гетлин во проблеми. Светскиот атлетски шампион на 100 метри се наоѓа под обвинение за вмешаност во допинг скандал. Случајот го лансира британски „Телеграф“ чиј новинар лажно се претставил и снимил разговор на спринтерот со неговиот тренер во тренинг центарот во кој му се нудат забранети супстанции.
Веднаш е подигната истрага, откако за време на состанокот е забележано дека менаџерот Роберт Вагнер изјавил дека Гетлин употребува поедини забранети супстанци.
„Не користам ниту некогаш сум користел забранети работи. Подготвени се сите правни механизми. Нема да дозволам да се пишуваат лаги за мене“, реагираше Гетлин преку социјалните мрежи и најави тужби.
Американскиот спринтер, кој беше позитивен на допинг контроли во 2001 година и во 2006 година, остро демантира дека ги кршел правилата поготово по разделбата со тренерот Денис Мичел поради изјавата дека некои супстанции не може да се откријат на тестови.
Гетлин во финалето на Светското првенство во Лондон истрча 100 метри за 9,92 секунди пред сонародникот Кристијан Колман (9,94 секунди) и Болт кој со 9,95 секунди го освои бронзениот медал.