Светските лидери упатија остра осуда до рускиот претседател Путин по повод денешните случувања. Во изјави и реакции тие го повикаа рускиот лидер да ја повлече војската и да се воздржи од натамошни напади.
Генералниот секретар на Обединетите Нации Гутереш вечерта пред нападот упати порака до Путин да ги спречи руските трупи од напад на Украина.
„Вечерва имам само едно да кажам од дното на срцето. Претседателе Путин спречи ги твоите трупи од напад на Украина. Дади му шанса на мирот. Премногу луѓе веќе умреа“. Веднаш по нападот на Русија врз Украина тој подвлече дека ја поправа изјавата од претходната вечер и рече: „Претседателе Путин, во име на човештвото, врати ги трупите назад во Русија. Овој конфликт мора да заврши веднаш“!
Урсула вон дер Лејен, претседателка на Европската комисија нагласи дека „руските сили ја нападнаа Украина, слободна и суверена земја“.
„Го осудуваме овој варварски напад и циничните аргументи кои се користат за негово оправдување. Подоцна денеска ќе претставиме пакет масивни, насочени санкции“, изјави таа.
Генералниот секретар на НАТО Јенс Столтенберг, пак, ја пренесе силната осуда на сојузниците на руската инвазија на Украина и додаде:
„Ја повикуваме Русија веднаш да прекине со својата воена акција, да ги повлече своите сили од Украина и да избере дипломатија. Ние целосно го поддржуваме суверенитетот и територијалниот интегритет на Украина и правото на Украина на самоодбрана“, истакна тој и посочи дека Северноатлантскиот совет одлучи да ги активира одбранбените планови на НАТО за заштита на сојузничките нации за време на оваа криза. „Ние ќе продолжиме да правиме се што е потребно за да ја заштитиме Алијансата од агресија“, подвлече Столтенберг.
Британскиот премиер Борис Џонсон го нарече рускиот напад врз Украина „катастрофа за Европа“.
„Претседателот Путин го избра патот на крвопролевање и уништување со тоа што го започна овој неиспровоциран напад врз Украина. Велика Британија не може и нема само да погледне настрана од рускиот грозен и варварски напад врз Украина“, рече Борис Џонсон.
Тој додаде дека Обединетото Кралство и сојузниците ќе започнат „масовен пакет“ санкции за да ја загрозат руската економија. Обединетото Кралство и неговите сојузници, како што најави, ќе се согласат за масовен пакет економски санкции во обид да ја загрозат руската економија. Џонсон предупреди дека Западот ќе треба да ја прекине својата зависност од руската нафта и гас.
„Нашата мисија е јасна: дипломатски, политички, економски и на крајот воено, овој грозен и варварски потфат на Владимир Путин мора да заврши со неуспех“, истакна Џонсон.
Францускиот претседател Емануел Макрон вети последици за руската инвазија на Украина во четвртокот, опишувајќи ја како пресвртница во историјата на Европа. Неговите коментари уследија откога Русија ја нападна воената инфраструктура низ Украина поради извештаите за жртви на
двете страни.
Американскиот лидер Џо Бајден рече: „Ова е почеток на руската инвазија на Украина. И ако Русија продолжи понатаму со оваа инвазија, ние сме подготвени да одиме понатаму – со санкција. Кој на Путин му дава право да прогласи нови таканаречени земји на територија што им припаѓала на неговите соседи? Ова е флагрантно кршење на меѓународното право и бара цврст одговор од меѓународната заедница. Во текот на последните неколку месеци, тесно се координиравме со нашите НАТО сојузници и партнери во Европа и ширум светот за да го подготвиме тој одговор. Ние цело време рековме и му кажав на Путин пред повеќе од еден месец – пред повеќе од еден месец дека ќе дејствуваме заедно и во моментот кога Русија ќе се пресели против Украина“, нагласи Бајден.
Денес, рече тој, ја објавувам првата транша од санкциите за наметнување трошоци на Русија како одговор на нивните вчерашни акции.
-Тие беа тесно координирани со нашите сојузници и партнери и ќе продолжиме да ги ескалираме санкциите доколку Русија ескалира. Спроведуваме целосно блокирачки санкции на две големи руски финансиски институции: V.E.B. и нивната воена банка. Воведуваме сеопфатни санкции за рускиот државен долг. Тоа значи дека ја прекинавме руската влада од западното финансирање. Таа веќе не може да собира пари од Запад и не може да тргува со својот нов долг ниту на нашите пазари, ниту на европските пазари“, изјави американскиот претседател.
Б.Ј.