Светските шампиони од Аргентина во денес рано наутро се вратија во татковината. Предводени од нивниот капитен Лионел Меси, „гаучосите“ ја совладаа Франција со 4:2 на пенали во финалето во Катар. Регуларното време и продолженијата завршија 3:3.
Меси, кој постигна два гола во решавачката пресметка со „петлите“, беше првиот играч кој излезе од авионот и го крена високо пехарот од Светското првенство. Веднаш зад него се најде селекторот Лионел Скалони, пренесува Франс прес.
Напаѓачот Хулијан Алварез, кој блескаше во Катар со своите четири гола, беше еден од следните што се појавија. На опашката на авионот блесна фотографија од Меси и зборовите: „Еден тим, една земја, еден сон“.
Играчите се упатија по црвениот тепих до автобус со отворен покрив, додека песната „Muchachos“ од ска-бендот Ла Моска свиреше на аеродромот.
Автобусот со играчите се упати кон базата на Аргентинската фудбалска федерација, каде што новите светски шампиони ќе одморат неколку часа пред вистинската прослава во Буенос Аирес. Илјадници навивачи ги затнаа улиците, а автобусот се движеше бавно додека играчите ги прифаќаа честитките и поздравите од публиката.
Фудбалерите во текот на денешниот ден треба да се појават пред Обелискот во центарот на главниот град, каде што ќе прослават со навивачите.