Светската здравствена организација (СЗО) соопшти дека некои третмани успеваат да ги ограничат тежината или должината на заболувањето од ковид-19 и дека се фокусира на четири или пет најветувачки лекови. СЗО се обидува да развие сигурна вакцина, тестови и лекови со кои треба да се спречи, открие и лекува коронавирусот.
„Постојат некои третмани кои се наоѓаат во многу ран стадиум, кои ја ограничуваат тежината или должината на болеста, но немаме ништо што го спречува или убива вирусот. Добивме позитивни податоци, но ни требаат повеќе за да бидеме 100 отсто сигурни кој третман делува“, изјави портпаролката Маргарет Харис, без да ги наведе третманите.
Фирмата „Гилиад Сајенс“ тврди дека нејзиниот антивирален лек Ремдесивир им помага на некои пациенти. Клинички податоци објавени минатиот месец ги зголемија надежите дека лекот Ремдесивир би можел да биде ефективен третман. Неколку студии за комбинации на антивирална медицина, исто така, посочуваат дека веројатно им помагаат на пациентите да се изборат со вирусот.
Тестови во Хонг Конг направени минатиот месец покажаа дека комбинација од три антивирални лека им ги намалиле симптомите на пациентите и го намалиле количеството на вирусот во нивните тела. Пациентите добиле комбинација од ХИВ лекот Лопинавир-Ритонавир, лекот за хепатитис Рибавирин, и третман за мултиплекс склероза.
Од друга страна, антималарискиот третман со хлорокин кој го туркаше претседателот на САД, Доналд Трамп, засега не покажал резултати, според некои студии.
Во СЗО се претпазливи во однос на очекувањата за вакцина, објаснувајќи дека коронавирусите се „многу незгодни“ и „тешко е за нив да се направи вакцина“. Во моментот во тек е работа на околу 100 потенцијални вакцини за ковид-19, а неколку влегоа во фаза на клиничко тестирање. Очекувањата на СЗО се дека вакцина најверојатно ќе има следната пролет.
