Претседателот на ДПА Мендух Тачи денеска не сакаше да коментира дали изборите треба да се одржат на 5 јуни, туку само посочи дека треба да се исполнат сите услови тие да бидат фер и демократски и оти сите треба да работат на тоа.
-Не би зборувал за конкретен датум, вие знаете дека тој датум нема ништо заеднички со нас и во моментот кога се гласаше во Собранието ние бевме воздржани. Јас опстојувам на тоа дека до дента на избори, кој било ден да биед треба да се исполнат сите услови за фер избори, иначе може се да пропадне, изјави Тачи по средбата со директорот на Директоратот за проширување во Европската комисија Кристијан Даниелсон.
Тој истакна дека и на средбата со Даниелсон разговарале за изборите.
-Со соговорникот утврдивме дека Македонија во споредба со лани кога беше пред амбисот се повлекла назад. Се сложивме дека фер и демократски избори се главниот лек за големата рана што се отвори минатата година. Сите политички партии треба да работат на исполнување на условите до денот на изборите, зашто по тоа ќе има проценка и сите треба да мислиме дека таа проценка за земјата треба да значи одење напред, посочи претседателот на ДПА.
Во Брисел вчера Даниелсон имаше средба и со македонскиот министер за надворешни работи Никола Попоски, кој по средбата изјави дека станало збор за актуелната политичка состојба во земјата и за процесот на организирање и подготовка на предвремените парламентарни избори во Македонија закажани за 5 јуни.
Даниелсон доаѓа во Македонија пред најавеното распуштање на Парламентот, а денеска пратениците ги изгласаа и новите министри во Владата предложени од ДУИ.
Даниелсон: Има уште многу работа до одржување на кредибилни избори
Ахмети до Даниелсон: ДУИ нема да биде жртва на монтирани материјали