Општина Битола, под палката на градоначалникот во куќен притвор, Владимир Талески, потпиша милионски договор за изградба на северната трибина на градскиот стадион „Тумбе кафе“. Договорот е склучен на 23 август, а е објавен денеска на интернет страната на Бирото за јавни набавки. Тендерот во вредност од 5 милиони и 400 илјади евра го доби градежната фирма „Гранит“ од Скопје.
НОВА контактираше со Службата за односи за јавност за да дознае кој го потпишал милионскиот договор, но до крајот на денешниот работен ден не добивме информација од општината.
„Можно е договорот да го потпишал лично Талески, но има опција и да има овластен потписник за овој тендер, бидејќи се објавува по втор пат и е од постар датум“, велат за НОВА извори од општината.
Битолскиот градоначалник Талески, кој е осомничен за злоупотреба на службената положба и проневера на пари во случајот „Транспортер, во домашен притвор е од 16 јуни. Но и покрај неговото физичко отсуство од Општината, сепак тој и натаму раководи со Битола.
Како што претходно објави НОВА, Општината функционира преку курирска служба која праќа документи и материјали до домот на Талески кој ги потпишува, верифицира и потоа се враќаат повторно во Општината, објасни пратеникот на СДСМ, Васко Ковачевски за НОВА.
И покрај тоа што по трет пат му е продолжен домашниот притвор, тој од дома носи одлуки и потпишува одлуки за Општината, наместо да назначи заменик, спротивно на Законот за локална самоуправа.
Според советничката во општина Битола, Габриела Илиевска од ВМРО-НП, Талески е во притвор и од притвор не може да носи одлуки и да потпишува документи.
„Тој требаше многу одамна да си поднесе оставка уште кога обвинителството потегна истрага против него, а не кога му беше доделен куќен притвор, тоа е веќе доцна“, вели Илиевска.
Според Законот за локална самоуправа и Статутот на Општина Битола, градоначалникот во рок од 60 дена по неговиот избор, треба да назначи заменик во случај тој да биде привремено спречен да ја извршува функцијата. Тие 60 дена изминаа, но Талески и натаму е градски татко на Битола.
Советничката Илиевска поднесе барање до Основниот и Апелациониот суд, како и до Специјалното јавно обвинителство да дадат мислење како се применува Законот за кривична постапка со случајот со градоначалникот Владимир Талески, кој повеќе од два месеца од куќен притвор раководи со општината.
Советничката поднела барање и до правната комисија на Собранието на Република Македонија за правно толкување на Законот.
НОВА ТВ испрати барање до Општината Битола пред повеќе од еден месец, но се уште нема добиено одговор зошто се уште не е назначен заменик за Талески во општината.