Талибанците денеска назначија 44 свои членови на клучни функции во Авганистан, вклучително и провинциски гувернери и началници на полицијата, што е клучен чекор во зајакнувањето на власта додека земјата се бори со растечките безбедносни и економски проблеми.
Тоа е прв голем круг именувања откако е формиран кабинетот во септември. Талибанците објавија список со новите функции на нивните членови.
Кари Барјал е назначен за гувернер на Кабул, а Вали Јан Хамза за началник на градската полиција.
Претходниот командант задолжен за безбедноста на Кабул, Мавлави Хамдулах Мухлис, беше убиен овој месец во напад врз најголемата воена болница во Авганистан во центарот на Кабул.
Талибанците ја презедоа власта во земјата на 15 август, но тие се соочија со тешка борба со ветување дека ќе го вратат редот и безбедноста по децении војна.
Џихадистичката група Исламска држава изврши напади низ целата земја, додека економијата ја зафати криза.
Испратени се меѓународни повици до Талибанците да преговараат со други политички актери за формирање на инклузивна влада која ќе вклучува малцинства и жени, иако досега не е постигнат значителен напредок