Припадникот на МВР кој вчера, како што денеска извести министерството, бил уапсен на паркинг пред хотел во Велес со ранец полн со службени материјали кои имал намера да му ги предаде на возач на „БМВ“, кој исто така е уапсен, е Ангел Самараков, член на обезбедувањето на премиерот Христијан Мицкоски, потврди за порталот „Скопје1“ владината портпаролка Марија Митева.
Митева вели дека по апсењето на телохранителот кој одавал службени тајни, безбедноста на премиерот Христијан Мицкоски не е загрозена.
Не е загрозена безбедноста на премиерот. Истрагата е во тек. За првпат во историјата на државата, уапсен е човек од обезбедувањето на премиерот поради сомневање за сторено кривично дело, изјави кусо Митева за „Скопје1“.
Дел од медиумите неофицијално објавија дека уапсениот наводно им давал информации на припадници на криминалната група од скопското село Грчец.
Обезбедувачот на Мицкоски е уапсен вчера во акција на Обвинителството за гонење на корганизиран криминал и корупција. Обвинителот направил повеќе истражувања, меѓу кои и претреси во неговиот дом и возила. Самараков, според МВР, незаконски поседувал материјали од Министерството, кои ги оддавал на трети лица.
При спроведувањето на полициската акција и преземените мерки и активности, на паркинг просторот пред хотел во Велес, во возило “бмв” затекнати се А.С., полициски службеник во Одделот за заштита на определени личности и објекти и Б.К., а при извршен претрес во возилото пронајден е ранец со службени материјали од МВР и од лицата се одземени мобилни телефони, по што се лишени од слобода. Исто така, од преземените мерки и активности во процесот на проверка, ОВККИПС констатира дека полицискиот службеник постапувал спротивно на законските и подзаконските акти на Министерството за внатрешни работи, со што истиот неовластено поседувал службени материјали, нивно откривање на трети лица надвор од министерството, а со кои дејствија го извршил кривичното дело по член 360 од КЗ, соопшти МВР.