Победнички старт имаше младата ракометна репрезентација на Македонија на скопскиот квалификациски турнир за Светското првенство оваа година. Совладана е Полска со 30:22 (16:8) во меч во кој во ниту еден момент не беше доведено во прашање славјето на крајот во СРЦ „Кале“. Мице Шилегов постигна 11 гола, Талески пет, Нелоски и Велковски по четири.
„Предупредив дека текот и исходот на мечот ќе зависи од воведот што беше одличен. Токму онака како што замислувавме и посакувавме. Полска беше добро проучена и врз основа на тоа што го знаевме поставивме одбрана 5-1 на која не можеа лесно да се снајдат и одговорат. Вечерва победивме со голема разлика, но мора да останеме на земја бидејќи ова е само почеток и ништо не е завршено“, рече Илија Темелковски, селектор на младинците.
Македонските млади ракометари го испочитуваа договореното. Врзаа три гола на почетокот и уште во 10 минута имаа плус 5. На тоа се надоврза и цврстата игра во одбрана, па и првиот гол Полјаците го забележаа по осум минути. Продолжението беше рутински одработено и на пауза се замина со големи осум гола разлика што навестуваа дека победникот е веќе решен по првите 30 минути. Така и беше. Двете селекции погодија по 14 пати во вториот дел и растојанието од полувреме остана идентично и по истекот на 60-та минута.
„Ова е само еден меч и не смееме да дозволиме да нè понесе. На ред е дуел со Португалија на кој мора да ѝ пристапиме со ладни глави. Ако сакаме да се пласираме на Светсккото првенство, не смееме да ги потцениме останатите ривали во групата“, нагласи Темелковски.
Утре со почеток во 17.45 часот, Македонија ќе игра со Португалија во второто коло на турнирот. Од 15 часот ќе играат Полска и Турција. Денеска, пак, Португалците ја совладаа Турција со 40:27.