Викторија Азаренка си постави логичен приоритет пред себе. Белоруската тенисерка ги стави во втор план тениските настапи и се фокусира на борба за старателство врз синот Лео. Комплицираната семејна ситуација во која се најде по породувањето е единствена причина поради која поранешната најдобра светска тенисерка го откажа учеството на Ју-Ес опен што ќе стартува во понеделник.
„Тажна сум што нема да можам да се натпреварувам на годинашното издание на Ју-Ес опен поради семејната ситуација што ја решавам. Ќе ми недостасува престојот во Њујорк и игрите на еден од моите најомилени турнири на кој доживеав многу убави моменти. Се радувам што догодина ќе играм на американскиот гренслем“, стои во соопштението за јавност на Азаренка.
Белорусинката се породи во јануари, а на ВТА турот се врати во јуни. Беше елиминирана во второто коло на турнирот во Мајорка и во четвртото на Вимблдон. Сега е принудена за ново отсуство бидејќи во меѓувреме се раздели со таткото на своето дете, па е принудена, во законски рамки, да го решава прашањето за старателство.
Законски, додека трае постапката, Азаренка не смее да го изнесе синот од Калифорнија каде е роден и каде живеееше семејството, а без него не сака да патува во Њујорк. Во дописот, меѓудругото, наведе дека не е подготвена да се одвои од Лео што е причина за откажувањето од Ју-Ес опен што важеше и за Мастерсот во Синсинати.
Азаренка има два настапа во мечевите за титула на Флешинг Медоу и во двата беше поразена од Серена Вилијамс во 2012 година и во 2013 година. Нејзиното место во ждрепката за главниот турнир ќе ѝ припадне на Јапонката Миса Егучи, потврдија организаторите на последниот гренслем во сезоната.