Екс премиерот Никола Груевски и поранешната министерка Гордана Јанкулоска денеска седнаа на обвинителна клупа за набавката на мерцедесот од 600 илјади евра, но веднаш побараа прекин на судењето, бидејќи како што рекоа и самите, но и нивните бранители, немале време да го прочитаат записникот од минатото рочиште.
Обвинителите од СЈО кои го покренаа овој случај под името „Тенк“, се спротивставија и побараа постапката да не се одолговлекува, а и судијката Добрила Кацарска им посочи дека нивен бил пропустот што наместо да дојдат во судот на 13 ти овој месец и да земат записник и це-де од рочиштето, тие тоа го прават денеска.
Судијката појасни дека иако судот немал обврска, сепак адвокатите биле и телефонски контактирани и им било укажано да дојдат и да земат записник. Јанкулоска рече дека не била известена да го подигне записникот, на што судијката Кацарска уште еднаш повтори дека судот немал обврска да ја известува.
Како што појасни Кацарска, поради добра волја на судот има дозволува половина час пауза, на што од место реагираше Груевски, кој констатираше дека записникот имал 17 страни, и дека немат доволно време да го прочитаат.
-Бев јасна, имате половина час пауза, рече кацарска, на што Груевскиизвика: „Не, не бевте јасна, дали слушнавте што ви кажа Јанкулоска“.
Судијата Кацарска повторно им објасни на обвинетите дека тоа што не добиле записници на време е пропуст на нивните бранители, додавајќи дека обвинителите од СЈО на време го подигнале.
-На човек со сила можеш да му земеш нешто, но не и да му дадеш, рече обвинителката Ленче Ристоска.
Кацарска по ова не му дозволи на Груевски да зборува, туку рече дека дала половина час пауза.