Судечкиот совет ги одби сите приговори на одбраната во случајот „Тенк“, во кој обвинети се поранешниот премиер Никола Груевски, поранешната министерката за внатрешни работи Гордана Јанкулоска и поранешниот помошник министер во МВР Ѓоко Поповски, за набавката на луксузниот „Мерцедес“ од 600 илјади евра.
Обвинетите нема да ги добијат прислушуваните материјали во аудио форма и тие во овој предмет ќе се користат како докази.
Груевски во судницата денеска тврдеше дека против него се води политички процес.
-Јас не би ја мешал политиката да не е ова политички процес. Може и новинарите да станат вештаци. Ова е брука од суд. Не сум изненаден што не ни ги прифативте приговорите, рече Груевски.
Груевски порача дека му закажуваат рочишта секој ден за да се дефокусира јавноста, оти власта го менува името.
-Ова е политички процес во кој судиите треба да одработат. И ме ставаат во судница затоа што Заев и Димитров го решаваат името и им треба да се збори за нешто друго, изјави Груевски.
Тој избегна да одговори дали нарачувал масажери и телевизори за мерцедесот, единствениот одговор беше дека случајот „Тенк“ е политички монтиран.
На ова судијката Добрила Кацарска го опомена да не зборува за политика во судницата.
Тенк: Груевски бара бомбите да не бидат доказ, биле јавно објавени
За драстично намалената вредност на мерцедесот, кој сега чини 234 илјади евра, а кој тој го нарача за 600 000 евра додека беше премиер, преку Министерството за внатрешни ,Груевски вели дека власта повторно се служи со популизам.
-Намерата е едно од двете, или планираат да создадат клима за да не се продава мерцедесот или планираат да го продадат на некој свој, трето не може да биде, изјави Груевски.
Одбиен е и приговор на адвокатката Сања Алексиќ, која ги оспори двете вештачења предложени од СЈО, а се на нивната листа на докази, со образложение дека вештаците немале валидни сертификати или им биле со изминат рок, а не им биле продолжени.
Станува збор за економско-финансиско вештачење и сообраќајно технички вештачења за набавка на „Мерцедесот“.
Поранешната министерка за внатрешни работи Гордана Јанкуловска, која е една од обвинетите за случајот „Тенк“ на денешното рочиште рече дека кај неа како обвинета постои сомнеж за објективноста на изработените две вештачења за набавениот „Мерцедес“.
– Ниту јас како обвинета, ниту моите бранители немавме можност да учествуваме со свои предлози и забелешки во вештачењето кое го нарачало СЈО, рече Јанкуловска.
Адвокатот на Груевски, Димитар Дангов, побара од судијката Добрила Кацарска утре да не се одржи рочиште за „Тенк“, за Груевски да се спремел за рочиштето за „Траекторија“, кое е закажано за в среда.
Според Дангов, било нечовечки Груевски во шест дена, секој ден да се појавува на судења што се водат против него.
Судот прифати утре да нема рочиште за „Тенк“, иако беше веќе закажано, а следното рочиште го закажа за во петок.