Адвокатите на Никола Груевски и Гордана Јанкулоска на судењето за набавката на мерцедесот од 600.000 евра, случај познат под кодното име „Тенк“ на СЈО, на денешното рочиште ги оспорија двете вештачења направени на мерцедесот по барање на СЈО.
Според нив, лиценцата на еден од вештаците му била истечена, а другото вештачење го правел вештакот Тале Герамичиоски кој бил поранешен пратеник и министер од СДСМ.
Исто така реагираа и дека вештачењата ги правела компанија од Италија, која во Македонија не била регистрирана за ваква дејност.
Гордана Јанкулоска рече дека ниту таа како обвинета, ниту нејзините бранители немале можност со свои предлози и забелешки да учествуваат во вештачењето кое го нарачало СЈО.
-Постои објективна оправданост и сомнеж во објективноста на вештачењата во однос на политичката кариера на вештакот Тале Герамичиоски и управителот на компанијата која била ангажирана, бидејќи токму во тој период исполнувале високи политички функции како избрани или именувани лица на предлог на СДСМ, а и јас исто така во тој период извршував високи функции во ВМРО-ДПМНЕ. Затоа барам од судот да го земе во предвид овој објективен сомнеж бидејќи нивниот политички ангажман го загрозува моето право на правично судење, рече Јанкулоска пред судот, при што се повика и на судска пракса од судот за човекови права во Стразбур,
Од СЈО одговорија дека на вештакот лиценцата му била продолжена за што приложија доказ, а за партиската определба на другиот вештак не сакаа да коментираат бидејќи тоа е негова лична определба.
Судијката даде еден час пауза за да одлучи по предлозите поднесени од адвокатите на обвинетите.
Во претходниот дел од рочиштето, адвокатите на Груевски и Јанкулоска побараа бомбите да не бидат коритени како доказ во процесот, како и СЈО да ја докаже надлежноста за овој случај.