Студент е уапсен по вечерашните инциденти во Ниш, каде претставници на владејачката партија СНС на Александар Вучиќ беа гаѓани со јајца, шишиња и полеани со вода, а голема група демонстранти се собра пред полициската станица.
Според првичните медиумски информации, студентот Матеја Николиќ е уапсен откако на социјалните мрежи објавил видео од гаѓањето на нишкиот градоначалник Драгослав Павловиќ со јајца. Павловиќ беше полеан и со вода, а полициските специјалци едвај го спасија и од полош третман од гневните демонстранти.
Откако и други функционери на СНС беа гаѓани со јајца и други предмети, што ги принуди претставниците на власта да го откажат најавениот форум и собирот на нивните приврзаници на кој требаше да се обратат Ана Брнабиќ и Милош Вучевиќ, српскиот претседател Александар Вучиќ се огласи на социјалните мрежи и најави дека вечерва доаѓа во градот. Тој ги повтори тврдењата дека со протестите во Србија раководат „странски служби“.
Во овие 13 години никогаш не сум почувствувал таков гнев и таква горчина како што чувствувам вечерва. Србија не го заслужи тоа што ѝ го прават и од странство и од домашните криминалци на чело со Драган Шолак. Имено, вечерва во Ниш се случи нешто што мислев дека никогаш не би можело да се случи кај нас. На брутален начин беа нападнати обични луѓе кои сакаа да присуствуваат на јавна дебата организирана од СНС, напиша Вучиќ на „Инстаграм“.