По внесените податоци во електронската евиденција на Државната изборна комисија, од теренската проверка, расчистен е сомнежот за 40.817 гласачи, а останата бројка од 46.475 ќе се проверуваат повторно со помош на МВР.
Според извештјот на анкетарите кои ДИК денеска го усвои со 7 гласа „за“ и 2 гласа „против“, од вкупно 87.352 прашалници кои биле доставени до подрачните одделенија и канцеларии низ земјава, вратени се 87 074 прашалници, со што се констатира дека недостасуваат вкупно 282 прашалници.
Според извештајот пак од ИТ експертите, недостасуваат вкупно 414 прашалници.
По ова настана кавга помеѓу членовите на ДИК. Според Игор Милев и Виолета Дума, членови од редовите на СДСМ, сомнеително е прифаќањето на два извештаи кои треба да дадат исти резултати и затоа гласаа против.
Според останатите, таа бројка е мала а се знаеле имињата и презимињата на лицата за кои ги нема прашалниците и за нив има механизми со повторно разгледување на базите кои ги има ДИК да се расчистат сомнежите.
Милев се сомнева во анкетарите кои во име на ДИК оделе на терен, бидејќи ниеден од нив немал потпишано договор или писмена изјава за соработка со ДИК, но според членот од ВМРО-ДПМНЕ, Силвана Бонева, ДИК ги имала имињата на секој еден од нив, а оние прашалници кои недостасуваат се поради тоа што при примопредавањето ниту раководителите на подрачните единици, ниту ДИК не ги пребројала.
По ова, се донесе заклучок, раководителите на подрачните единици да достават образложение за секој прашалник зошто недостасува.
За онаа бројка од 46.475 кои ќе се проверуваат со повторна проверка во базите на податоци или со помош на МВР, најголем е сомнежот за 8.878 лица, за кои анкетарите добиле одговор дека живеат на дадената адреса но дека се привремено надвор од државата.
5.093 живееле но се иселиле на друга адреса, 523 починале, а 2.945 гласачи живеат во земјава, но престојуваат на друга адреса.