Експлозии, огнено оружје, ножеви…сите овие смртоносни алатки беа употребени годинава за напади на територијата на Германија, а последниот од нив е вчерашниот терористички напад во Берлин за време на божиќна прослава, во кој 12 луѓе беа убиени а речиси 50 повредени.
Во јули годинава, 10 луѓе беа убиени во различни напади, во кои употребен беше пиштил, бомба и мачета. Три од нив се одвиваа во Баварија, додека еден во Баден-Вертемберг. Но и покрај тоа што полицијата тогаш рече дека нападите не биле поврзани меѓу себе, се алармираа безбедносните служби за можно повторување на слични инциденти. Последниот таков, се случи вчера.
На 18.јули, тинејџер по потекло од Авганистан упадна во воз со секира и нож, при што повреди петмина. Тој беше застрлеан од страна на полицијата.
Неколку дена подоцна, на 22.јули, германски тинејџер со иранско потекло уби деветмина во Минхен а потоа изврши самоубиство.
Само два дена подоцна, на 24.јули бегалец од Сирија, употребувајќи мачета уби една жена а повреди уште други петмина, по што беше уапсен.
Истиот тој ден, 27-годишен Сириец, откако добил информација дека неговото барање за азил е одбиено, се разнесе со бомба во Ансбах. Повредени беа 15 луѓе по неговиот акт.
Германските власти, по истрагите кои досега ги имаат спроведено, во извештаите забележуваат дека, повратниците од воените жаришта признавале дека Исламската држава низ терористички ќелии на неколку пати регрутирала, и се уште го прави тоа на ниво на цела Германија, но истото го спроведувала и во Велика Британија.
Како во Германија, алармот е вклучен и во Белгија и особено во Франција. Настанот кој вчера се случи во Берлин, е дежа ву на случувањата во Ница во Франција годинава, кога во јули, за време на прославата на Денот на Бастиља, терорист влета со камион во собирот при што прегази над 80 луѓе.