Од пребројани 98,92% од гласовите на предвремените парламентарни избори во Бугарија, води партијата „Има таков народ“ (ИТН) раководена од телевизискиот шоу-мен, Слави Трифонов, со освоени 23,91% гласови, додека партијата ГЕРБ на Борисов има освоено 23,69% гласови, што е тесна битка меѓу Трифонов и Борисов. Бугарската социјалистичка партија (БСП), според првичните резултати е трета со 13,51% од гласовите. Следна е Демократска Бугарија со 12,56%.
Поранешниот премиер на Бугарија и лидер на партијата ГЕРБ, Бојко Борисов, изрази сомнеж во резултатите од синоќешните предвремени парламентарни избори.
-Во 11 часот Трифонов објавува влада. И вели чекам Радев да ми го прати мандатот. До тој период ГЕРБ е прва политичка сила, од каде знае Слави Трифонов што ќе се случи после? Централната изборна комисија од 7.30 часот сè уште нема објавено конечни резултати, а изминати се 17 часа. Се бројат два процента, вели Борисов.
Лидерот на ГЕРБ, смета дека водењето малцински кабинет со поддршка од 60 пратеници и без преговори со останатите парламентарни партии е практично невозможно.
– Со изјавата на Слави Трифонов дека ќе предложи малцинска Влада, тој, реално не сака да направи Влада, изјави Борисов.
Според Борисов, Трифонов требало да ги претстави своите приоритети пред останатите партии кои изборија учество во парламентот и да бара поддршка за одделни политики. Тој воопштно не очекува ИТН да формира Влада.
– Планот им е друг. Бојко Рашков (актуелниот прв човек на МВР н.з) да беснее на функцијата додека може, додека не исчепка сè што може. Тоа е играта на Румен Радев. Да остане техничката влада на власт. Тоа е сценариото, изјави Борисов.
Инаку, лидерот на ИТН, Трифонов, најави дека неговата партија ќе го преземе мандатот за форимрање Влада и ги претстави предложените министри. Тој најави дека нема да коалицира со другите партии и дека ќе предложи своја Влада. Трифонов, чија партија е во тесна трка со партијата на Борисов, ветува изградба на градинки, патишта, болници, а исто така посочи дека има голема желба и да испрати астронаути во Вселената.