Министерот за финанси Драган Тевдовски денеска најави дека до крајот на годината ќе има промени во буџетското планирање, преку нов предлог закон за реформи.
– Јавниот долг изнесува 4,7 милијарди евра и потребно е да се промени среднорочното буџетско планирање. До крајот на годината ќе има промени во буџетската рамка со предлог-закон за реформи во овој дел, изјави денеска министерот Тевдовски, одговорајќи на новинарски прашања на прес-конференција во Владата по средбата со претставници на Светската банка.
Тој додаде дека е подготвена и предлог стратегија во која има серија мерки за да се постават алатки за кредибилно управување со јавниот долг. Тоа, како што рече, е во насока на препораките на Светка банка, на ЕК, на СИГМА, како наши стратешки партнери.
Стратегијата е на среден рок за период од 2018 до 2021 година за управување со јавни финансии со која се зафаќа и делот на јавниот долг.
Во стратегијата има седум приоритети, а еден од главните е транспареноста, на што е посочено и од страна на Светска банка.
Меѓу алатките е и формирањето фискален совет, кој е само еден од механизмите кои ќе прават еден вид анализа и контрола.
– Ако сакаме во Македонија да имаме кредибилни јавни финансии значи да го подобриме процесот на транспареност. Второ, да се подобри проекцијата на буџетските приходи и расходи, да се мисли на среден рок и да се постават некои механизми, рече Тевдовски.
Линда Ван Гелдер, директор на регионот западен Балкан во Светска банка, рече дека ги очекуваат ефектите од тековните проекти, кои се спроведуваат во Македонија, поделени во седум операции, со поддршка од 350 милиони долари.
Светската банка ќе биде силен партнер во развојот на Македонија, и дека нивните активности се насочени кон подобрување на енергетската и патната инфраструктура, подобрување на иновативноста, но и на социјалната заштита со осврт на сиромашните, рече Ван Гелдер.