Противкандидатот на Александар Лукашенко на претседателските избори во Белорусија, Светлана Тихановскаја изрази подготвеност да стане национален лидер.
„Подготвена сум за преземање на одговорноста и да дејствувам како национален лидер со цел да ја смирам ситуацијата во земјата и да ја вратам во нормален ритам“, нагласи таа во видео пораката објавена на каналот „Јутјуб“.
Во исто време, таа побара ослободување на сите политички затвореници, како и подготовка на правна рамка и услови за нови претседателски избори што ќе бидат признати од меѓународната заедница.
Во Белорусија веќе една недела се одржуваат протести по претседателските избори на кои старо-новиот шеф на државата Александар Лукашенко прогласи победа со над 80 проценти од гласовите. Тихановскаја на тие избори освои околу 10 отсто гласови, но потоа замина во Литванија.
Лукашенко: Нема да има повторно избори
Претседателот на Белорусија, Александар Лукашенко денеска изјави дека ќе нема нови избори во таа држава.
„Вие нема да доживеете да го видите денот кога ќе направам нешто под притисок. Нови избори ќе нема, бидејќи во тој случај, нема да има фабрики, нема плантажи. Се ќе биде уништено за половина година“, рече Лукашенко.
Тој денеска посети фабрика и во таа прилика рече дека има информации дека сите фабрики во државата работат нормално. Неколку стотици демонстранти, пак, се собраа пред портите на фабриката за време на неговата посета, држејќи транспаренти со кои бараа негова оставка.