Рочиштето за случајот „Титаник“ на СЈО кое беше закажaно за денеска се одложи бидејќи се уште нема одлука по барањето на адвокатот Еленко Миланов за изземање на судечкиот совет во предметот, како и на претседателот на Кривичниот суд и на судии од Апелацискиот суд во Скопје.
Следното рочиште, судијата Осман Шабани го закажа за 2 мај.
Адвокатот Миланов, кој е дел од адвокатскиот тим на Никола Груевски, на минатото рочиште побара изземање на судиите Осман Шабани и Огнен Ставрев од овој предмет, бидејќи, како што кажа, специјалната јавна обвинителка Катица Јанева во телевизиско интервју изјавила дека дел од судиите биле прислушувани или ги имало во „бомбите“. Тој побара да се провери дали судиите Ставрев и Шабани биле прислушувани за што, како што рече, досега не добил одговор од СЈО.
На денешното рочиште не присуствуваше обвинетата Гордана Јанкулоска, поради „ризична бременост“.
Адвокатката на Јанкулоска, Сања Алексиќ рече дека боледувањето и трае до денеска и дека утре е на контрола на лекар по што ќе се знае дали ќе биде продолжено боледувањето.
Од куќен притвор денеска во Кривичниот суд не беа спрведени Едмонд Темелко и Мунир Пепиќ.
Во „Титаник“, што е прв случај обелоденет од СЈО, покрај поранешниот премиер Никола Груевски, обвинети се и поранешните функционери Мартин Протуѓер, Кирил Божиновски, Миле Јанакиески, Гордана Јанкулоска, Билјана Бришкоска Бошковски, како и Илија Димовски, Мунир Пепиќ, Едмонд Темелко, Леко Ристовски, Кирил Тодоровски, Катерина Веловска, Станко Коруновски, Коста Марковски, Драгче Драгчески, Марјан Накевски, Гоце Јаневски, Џезми Ахмет, Роберт Давитков, Далибор Алешковиќ и Ленка Рашајковска.
Тие се осомничени од СЈО за злосторничко здружување, повреда на избирачкото право, повреда на слободата на определување на избирачите, поткуп при избори и гласање, уништување изборен материјал и злоупотреба на средства за финансирање изборна кампања.