Министерот за здравство Никола Тодоров избега од камерата на НОВА во моментот кога требаше да биде прашан дали ќе си поднесе оставка заради скандалот кој го обајви НОВА со студентката по медицина која од февруари извршува докторска дејност во Итната медицинска помош. Иако претходно пристигна краток одговор од Министерството за здравство и ни беше кажано дека може да земеме изјава во камера, по прес конференцијата на друга тема во болницата “8 Септември“, од само на него познати причиниТодоров се предомисли и си замина.
„Брзам морам да одам на друго место. Не постои никаква студентка по медицина“, рече Тодоров на заминување.
Во одговорот кој само еден час претходно го добивме по електронски пат од Министерството за здравство, се вели дека тие немаат надлежност да носат одлуки за вработување, туку тоа е во надлежност на установата.
„Информираме дека согласно Законот за здравствена заштита, постапката за вработување или ангажирање лица во јавните здравствени установи е во надлежност на самите установи. Јавните здравствени установи се самостојни правни лица, кои самостојно одлучуваат за вработување, односно ангажирање на лица од медицински или не медицински персонал во установата, што значи дека Министерството за здравство нема надлежности да носи одлуки од ваков тип. Во конкретниот случај, јавната здравствена установа го испитува случајот и доколку се утврди било каква одговорност, очекуваме да бидат преземени сите мерки согласно законските прописи“, се вели во соопштението од Министерството за здравство.
ВИДЕО: Вработената студентка самата објаснува дека диплома зела завчера. Следниот термин за полагање државен испит е во ноември, а дури потоа може да добие лиценца за работа, но таа и со овој статус е докторка спротиввно на законите
И управителката на Итната медицинска помош, Анета Димовска не сакаше да одговори на прашањето кој ја вработил и кој и дозволил на студентката Марина Србиноска да извршува докторска дејност, да прегледува, да им дава терапија на пациентите и да оди со возило на итни повици.
„Тоа да си прашате во повисоките институции, нема што јас да ви одговорам“, реча Анета Димовска и веднаш ја прекина линијата.
Во Здравствениот дом Скопје, под чија надлежност е Итната медицинска помош одговорија со писмено соопштение во кое се вели дека ги испитуваат околностите како дошло до ангажирање на работа на лице кое не ги исполнува условите. Во соопштението признаваат дека времено биле ангажирани поголем број луѓе како што се доктори на медицина, медицински сестри и возачи со договор на дело, за потребите на Домот.
„По завршување на постапката од страна на надлежните и стручни служби во рамките на Домот кои ја спроведувале истата, биле подготвени договори за времено ангажирање на лицата, кои како такви биле потврдени од страна на одговорно лице во правната служба на Домот, потоа биле потпишани од самите лица, а на крајот само верифицирани од одговорните лица на установата. Во овој момент ЈЗУ Здравствен дом Скопје ги превзема сите активности за утврдување на фактите дали и како дошло до склучување на договор за ангажирање на лице кое не ги исполнувало условите, како и лоцирање на одговорноста кај стручните служби за евентуалниот пропуст. Доколку се утврди било каков пропуст, ЈЗУ Здравствен дом Скопје ќе покрене дисциплинска постапка за санкционирање на вработените кои го направиле пропустот и го нарушиле угледот на Установата“, се вели во одговорот од Здравствениот дом Скопје.
Од друга страна во Деканатот на Медицинскиот факултет за НОВА потврдија дека Србиноска дипломирала на 17 мај, а уверението за положени испити го земала на 20 јуни. Деканот Никола Јанкуловски тврди дека од нивна страна не е направено ништо што би било надвор од правната регулатива.
„Никој не ми се јавил за да потпишам нешто што е надвор од правната регулатива, пријавите се во ред“, изјави за НОВА Јанкуловски, декан на Медицински факултет.
Во Лекарската комора на РМ велат дека докторска дејност може да врши само лекар кој поминал стаж од шест месеци, положил стручен испит и се стекнал со валидна лиценца за работа.
„Одговорноста треба да ја сноси тој што ја вработил „докторката “без лиценца“, изјави Кочо Чакаларовски претседател на Лекарската комора на РМ.
Неговата заменичка Ленче Неловска пак, рече дека комората не е надлежна за лица кои немаат лиценца за работа и смета дека треба да се свика етичкиот комитет за да расправа за случајот.
Во исто време студентите на медицина и специјализантите бараат одговорност, како и на студентката никогаш да не и се даде лиценца за работа.
НОВА од свои извори во Итната медицинска помош дознава дека Србиноска е избишана од списокот на дежурства, а таа денеска не се појавила на работно место и најавила дека ќе ја нема неколку дена. Таа го избриша и нејзиниот Фејсбук профил. Неофицијално, во Итната медицинска помош било најавено и дека ќе се повикуваат и испитуваат вработени за да се дознае кој ги испратил фотографиите и документите на НОВА од кои се гледа дека „докторката“ поседува незаконски стекнат печат без број и дека интервенирала и давала терапии на пациенти. Инаку, 24 годишната студентка била примена на работа по договор на дело во февруари годинава и пет месеци извршувала докторска дејност иако немала диплома и државен испит после кој треба да се стекне со лиценца за работа. Најбрзиот рок кога може да полага државен испит е дури во ноември.