Два смртни случаи се регистрирани неделава поради високите температури што ја зафатија Шпанија.
Првата жртва од топлотниот бран е работник од Нигерија, кој починал во вторникот додека работел на изрградба на пат во близина на градот Мурсија, додека втората жртва е 78-годишен пензионер, на кого му се слошило додека работел во градината. Тој почина во болница. Се претпоставува дека двајцата починале од топлотен удар.
Според метеоролозите денеска е најтоплиот ден оваа лето во Шпанија со температура од 40 степени во Мадрид, 42 во Севиља и Андалузија, 43 во Ксерес и 44 степени во Бадахос и Естремадура.
Метеоролошката служба на Португалија денеска соопшти дека на осум мерни места во земјата измерила рекорно високи темепратури на воздухот, од кои највисоката -45,2 степени целзиусови во близина на градот Абрантеш, североисточно од Лисабон.
За денеска португалските метеоролози предвидуваат темпертури до 45 степени Целзиусови, а за утре најавуваат уште потопло време и температури и до 47 степени.
Највисоката температура во Португалија досега, е измерена во текот на летото 2003 година и изнесувала 47,4 степени Целзиусови.
Поради исклучително топлото време, во Португалија за прогласен црвен метеоаларм, а спасувачките служби, медицинскиот персонал и противпожарните бригади се ставени во состојба на зголемена готовност.
Германски пожарникари денеска го гаснеа пожарот што од синоќа беснее во националниот парк „Саксонска Швајцарија“.
Облаци од чад се издигаат над регионот, кој се наоѓа до реката Елба во источната германска покраина Саксонија, каде е и познатиот Бастеи мост.
Властите соопштија дека пожарот опфатил неколку тешко достапни места, а на пожарникарите во гаснењето им помагаат планински спасувачи и планинари.
Засега не е позната причината за избувнувањето на пожарот. Огнот зафати околу 4.000 метри квадратни метра, но нема опасност за блиското планинско село Ратен, а нема информации ни за жртви.
Во последните недели, Германија и другите делови на Европа, беа погодени од високи температури, а големи пожари избувнаа и во Грција и Шведска.
Токму поради сушата денеска до темел изгоре детска градинка во северна Германија откако пожарникарите не успеале да најдат вода за да го стават огнот под контрола.
Во двата противпожарни хидранти во близина на градинката во селото Ворден, во провинцијата Шлезвиг-Холштајн, немало доволно вода за гаснење на огнот по неколкуте недели топло и суво време во Германија, изјави локалниот пожарникар Оле Крогер.
Поради тоа, морало со цистерни да се носи вода од место оддалечено неколку километри.
Најверојатна причина за пожарот била изведување на работи со катран, во непосредна близина на греадинката, при што се запалила дрвена подлога.
Повеќе од 100 пожарникари учествувале во гаснењето на пожарот.
Градинката била затворена за време на летниот одмор.