Судењето за случајот „Тортура“ е одложено за 23 март, до кога треба да биде донесена одлуката на која се чека од Апелација – дали во предметот за нечовечко однесување и изживување врз Љубе Бошкоски, за време на апсењето на 6 јуни 2011 година, ден по предвремените парламентарни избори, освен шестмината припадници на специјалните единици Алфи, ќе одговара и екс директорот на тајната полиција Сашо Мијалков.
Судот денеска укажа дека еден месец откако е поднесена жалба од СЈО на одлуката Мијалков да не одговара, се уште нема одговор од Апелација.
Денеска во судница се појави Љубе Бошкоски, како оштетен во случајот и се соочи со Ивица Анчевски – Пуки, кој во 2011 беше на чело на Алфите и беше дел од припадниците на оваа единица кои спектакуларно го апсеа Бошкоски пред ресторанот „Воденица“.
По одложувањето на рочиштето, одговарајќи на новинарско прашање дали очекува на суд да се појави поранешниот шеф на тајната полиција Сашо Мијалков, Бошкоски рече дека доколку судот одлучи дека тој треба да се појави, сигурно ќе дојде.
-Не чувствувам некоја специјална потреба за тој лик да го видам на судењето, истакна Бошкоски.
Прашан дали денеска во судот првпат ги гледа припадниците на единицата „Алфи“ кои го апсеа рече дека ги гледа првпат по речиси седум години.
-Истите ликови се. Сега не се толку расположени како тој ден кога ја извршуваа задачата од нивниот наредбодавецот и тогашен шеф на државната безбедност, рече Бошкоски.
Судиката Моника Бахчовановска, при оценка на обвинението на СЈО, одлучи да го изземе Мијалков од кривичен прогон. Оваа судијка е жена на поранешен висок функционер во владата на Груевски.
На оваа одлука СЈО поднесе жалба до Апелацискиот суд, кој треба да одлучи дали обвинителниот акт ќе се однесува и на Мијалков.
Во една од „бомбите“ што ги објави опозицијата, токму за овој настан разговараат екс директорот на УБК Мијалков и тогашниот главен уредник на ТВ Сител Драган Павловиќ Латас, против кого се води друг процес од СЈО.
На аудио снимката соговорниците зборуваат за начинот на кој се постапувало со Бошкоски за време на апсењето.