Во Кривичниот суд денеска се слушаа „бомбите“ кои Специјалното јавно обвинителство ги поднесе како доказ за случајот „Траекторија“, односно за изградба на автопатите Кичево-Охрид и Миладиновци-Штип.
Во еден од разговорите екс министерот Миле Јанакиески го известува екс премиерот Груевски дека Кинезите доставиле понуда за автопатот Миладиновци-Штип.
„Кинезите доставија и официјална понуда за Миладиновци-Шитп од 288 милиони евра, му вели Јанакиески на Груевски. Тој пак прашува – Дали е тоа многу? Јанакиески му објаснува дека не е многу, бидејќи проценетата вредност била 250 милиони евра.
Миле Јанакиески во неколку наврати разговара и со тогашниот амбасадор во Кина, Оливер Шамбевски.
Во еден од нивните разговори, министерот го информира амбасадорот дека тука работата се средува и сега треба да оди во Кина, за да како што вели, потпише таму меморандум со главниот.
„Ова со Кинезите ми е основната база за следните парламентарни избори“ вели Јанакиевски. Во друг разговор Јанакиески го известува Шамбевски дека одлучиле на Кинезите да им дадат едно земјиште што го барале кај Аеродром, а Шамбевски го советува да не брзаат. Исто така, Јанакиевски вели дека проблем со „Ексим“ банката е како долгот да не влезе во ставката буџетски дефицит, туку како долг.
„ Главен проблем со „Ексим“ банка е што ние бараме да биде преку акционерско друштво, така што, парите нема да влезат како буџетски дефицит, туку како државен долг“ му вели Јанакиески на македонскиот амбасадор во Кина, Оливер Шамбевски. Во Судот присутни беа и поранешниот премиер Никола Груевски, поранешниот вицепремиер Владимир Пешевски, екс министерот за транспорт и врски Миле Јанакиески и поранешниот директор за државни патишта Љупчо Георгиевски, кои се осомничени дека во 2012/2013 година ги пречекориле своите овластувања во постапката за избор на компанија за изградба на автопатските делници до Штип и Охрид и нанеле штета на буџетот на државата од најмалку 155.117.172 евра.
Специјалното јавно обвинителство за овој случај има обезбедено над 300 бомби, а до сега во судница се слушнаа петнаесетина.
Одбраната на Никола Груевски, поранешниот вицепремиер Владимир Пешевски и на ексминистерот Миле Јанакиески, побараа дел од „бомби“ за случајот „Траекторија“ да не се пуштат денеска во Основниот суд Скопје 1 во присуство на јавноста, поради заштита на државниот интерес. Судијата Бошевски го прифати нивното барање и на денешното рочиште се слушаа само разговорите за кои адвокатите на обвинетите дадоа согласност.
Обвинителката на СЈО Лиле Стефанова кажа дека дел од тие разговори се „суштински„ за предметот.