Градоначалникот на Скопје, Коце Трајановски треба самиот да се преиспита кој е тој што го тероризира градот, велат активистите од Шарената револуција, откако синоќешниот масовен протест, “таткото на главниот град“ го опиша како уништување на Скопје.
– Барам да престанат да го тероризираат главниот град. Барам да ги остават граѓаните на градот Скопје на мир…Исто така барам да не доаѓаат со автобуси од други градови за да го уништуваат главниот град. Нека дојдат, нека уживаат и нека се вратат во своите градови, а не да дојдат да го уништуваат главниот град, порача денеска во својата изјава Трајановски.
Замир Мехмети пак, еден од најактивните демонстранти на граѓанското движење Шарена револуција, вели оној кој го тероризира градот е токму Трајановски, кој аминувал низа скандалозни проекти.
– Ако некој го тероризира градот Скопје тоа е градоначалникот Коце Трајановски. Тој ќе остане во историјата како еден од најлошите градоначалници кој аминувал низа скандалозни проекти, и нема никакво морално право да коментира за уништување на градот. Шарената револуција е најубавото нешто што и се случува на Македонија изминатиот период, реагира Мехмети.
Мехмети дополни дека самото тоа што Трајановски немал коментар за собирот на ГДОМ пред Кривичниот суд, само го оспорува неговиот кредибилитет за коментар.
– Што е ГДОМ? Какво е тоа граѓанско здружение кое се собрало пред суд за да брани криминалец. Тоа е само лоша партиска гранка, односно Граѓанско здружение за одбрана на криминалци, вели меѓу другото Мехмети.
Собирот на Шарената револуција вчера, кој започна во 19 часот пред седиштето на Специјалното јавно обвинителство, беше најголемиот собир на слободна граѓанска маса, а се организираше со цел да се покаже револтот кон актуелната власт и претседателот Ѓорѓе Иванов.
Во протестите кои траеа околу три часа демонстрантите имаа неуспешен обид за рушење на споменикот на Прометеј, односно беа спречени од страна на специјалните полициски сили.
Неколку часа претходно, пред Кривичниот суд во Скопје, ГДОМ организираше собир за поддршка на Основниот суд 1, како и за градоначалникот на Битола, Владимир Талевски кому неодамна му беше доделен домашен притвор.
На тој собир пак, помеѓу другите градоначалници од скопските општини, беше и првиот човек на градот, Коце Трајановски.