Градоначалникот на Општина Делчево, Горан Трајковски, на трибина на СДСМ под мотото „Најдоброто за нашата општина“ пред сограѓаните зборуваше за реазлизираните проекти во изминатите четири години и ги повика на заедничко изготвување на програмата за наредните четири години, програма за локален економски развој и подобар квалитет на животот.
– Интензивно работевме за да го подобриме квалитетот на животот во Делчево. Ги реализиравме сите капитални ветувања, а од програмата се реализирани високи 80% од ветените проекти, но и реализиравме проекти кои не беа ветени во програмата, но беа долгогодишен товар на граѓаните, рече Трајковски пред граѓаните во Делчево.
Тој наведе дека за неполни четири години во Делчево се изградија и реконструираа околу 20 км локални патишта и улици, издвојувајќи го урбанизирањето на населбата Басарица, каде немаше ни милиметар асфалт, како и рехабилитацијата на транзитниот булевар „Македонија“ во Делчево, рехабилитацијата на државниот пат А3 од село Ѕвегор до граничниот премин Делчево, рехабилитација на регионалниот пат Делчево-Пeхчево.
– Во овој период изградивме околу 5 км атмосферска и водоводна инсталација и 6 км фекална канализација, рече Трајковски.
Тој рече дека интензивно се работи на дореализација на големиот проект со за чиста вода за сите граѓани на Делчево и за селата Габрово и Ѕвегор – проектот „Водоснабдување на Делчево“.
Трајчевски во говорот спомена повеќе прокети за енергетска ефикасност, како изградбата на првиот пешачки мост на река Брегалница, изградба на градинки, градската капела, современиот градски пазар кој ќе биде завршен до крајот на годината.
– Вкупно сме вратиле 70 милиони денари стари наследени обврски. Општината должеше на советниците од претходниот состав, на новороденчињата, на пожарникарите, не беа исплатени стипендиите на најдобрите ученици и студенти на Делчево, општината должеше на фирми и изведувачи… сега, обврските се сервисираат тековно, општината е ликвидна и повратен е нејзиниот углед. Нема да дозволиме нашето Делчево и нашите сограѓани да бидат повторно заложници на група луѓе чиј единствен интерес е личниот, рече Трајковски.
На трибината беше присутен и потпретседателот на СДСМ и министер за внатрешни работи, Оливер Спасовски, кој пред граѓаните кажа што направила власта за граѓаните во изминатите четири години, како и за дадената помош на граѓаните во ковид кризата.