Доналд Трамп призна денес дека американскиот Конгрес ќе даде пари за изградба на анти-имигрантскиот ѕид на границата со Мексико за да може да се оствари неговото изборно ветување.
“Нечесните медиуми не кажуваат дека парите потрошени за изградба на Големиот ѕид (за да биде побрзо) ќе бидат вратени од Мексико подоцна”, напиша Трамп на Твитер, неговото омилено место за комуникација.
Си-Ен-Ен објави вчера дека екипата на новоизбраниот претседател имала контакти со луѓето од Републиканската партија со барање да се финансира ѕидот кон Мексико со пари на даночните обврзници на САД и тоа што побрзо, веќе од април.
Според ветувањето на Трамп ѕидот треба да биде “огромен, моќен и убав” и да се издигне на јужната граница на САД во должина од над 3.000 километри. Ова ветување ги воодушеви неговите приврзаници а на прашањето кој ќе плати за ѕидот Трамп одговараше: “Мексико”.
Цената на ѕидот не е се уште одредена но би требало да чини повеќе милијарди долари.