Американскиот претседател Доналд Трамп одлучил да го смени својот советник за национална безбедност генерал Херберт Мекмастер, објавуваат денеска американските медиуми, повикувајќи се на свои извори.

Според информациите, смената нема да се случи брзо, бидејќи Трамп се уште не се одлучил, кој би го наследил, меѓу кои предлози се и поранешниот постојан претставник на САД во ОН, Џон Болтон и началникот на канцеларијата на Советот за национална безбедност, Кит Келог.

Белата куќа веднаш демантираше на Твитер.

– Претседателот Доналд Трамп има добри работни односи со генералот Мекмастер, а составот на Советот за национална безбедност на Белата куќа нема да се менува, напиша на Твитер портпаролката на Белата куќа Сара Сандерс.

Но извори блиски до Белата куќа тврдат дека смената е извесна и дека Трамп планира да направи и други кадровски промени во Белата куќа.

Трамп оваа недела сигнализираше дека е подготвен да ги разреши сите помошниците со кои има несогласувања и дека сака тим со ставови усогласени со неговата популистичка агенда.

Во вторникот, претседателот го отпушти државниот секретар Рекс Тилерсон и им изјави на новинарите во Белата куќа дека е блиску до својот идеален тим.

Во атмосфера на шпекулации за судбината на Мекмастер, Си -Ен-Ен објави дека генералот е во разговори со Институтот Хувер, позната тинк тенк организација на Универзитетот Стенфорд во Калифорнија.