Од денеска нова визија ќе ја води земјата, САД повторно ќе биде на прво место и повторно ќе победува, рече во говорот новиот американскиот претседател Доналд Трамп, при давање на заклетвата.

„Ќе се памети овој 20 јануари 2017 година, ден кога народот стана владетел на оваа земја, повторно“, порача Трамп во говорот по положувањето на заклетвата во Капитол Хол, со што и официјално стана 45 претседател на САД.

„Ние граѓаните на САД сега сме заедно во големиот национален зафат. Ќе го одредиме курсот на Америка. Ќе се соочиме со предизвици и тешкотии, но ќе ја завршиме работата, рече Трамп.

Според новиот претседател, САД ќе бара пријателство и добра воља во односите со другите земји во светот, но се разбира, дека право на сите нации е своите интереси да ги стават на прво место.

„Не бараме да го наметнеме нашиот начин на живот на другите, но ќе бидеме пример, кој сите ќе го следат. Ќе ги зајакнеме старите алијанси, ќе воспоставиме нови, ќе го истребиме исламскиот тероризам од лицето на земјата“, истакна Трамп.

Тој рече дека церемонијата има посебно значење, не само заради тоа што се предава власта од една администрација на друга, или од една партија на друга, туку заради тоа што “власта се префрла од Вашингтон и му се дава на народот“.

Според Трамп, долго време една мала група во престолнината на САД ги жнеела плодовите додека луѓето плаќале цена. Вашингтон цветал, а луѓето не го делеле богатството, политичарите оделе напред додека фабириките и работните места се затворале, естаблишменотот се штител себеси, но не и граѓаните.

„ Се тоа се менува од ова место и овој момент е ваш. Ова е ваш ден, ваша прослава. САД е ваша земја“, рече Трамп.

Тој рече дека САД со децении ја подржувале странската индустрија и земјоделството на другите земји на сопствена штета, ги бранеле границите на туѓите земји, одбивајќи да ги бранат своите. Потрошени се илјадници милијарди долари во странство додека американската инфраструктура падна во очајна состојба, а богатството, смислата и самоувереноста на САД се распадна и милиони работници останаа заборавени додека другите земји станаа богати, потенцира Трамп.

„Тоа е минато, сега гледаме во иднината. Од овој ден нова визија ја води нашата земја, Америка ќе биде на прво место“, рече Трамп.

Тој најави нови патишта, мостови, аеродроми, тунели, железница, дека ќе ги врати луѓето на работа.

„Ќе ја градиме нашата земја со наши раце. Ќе ги почитуваме двете правила: Купувајте американски производи и вработувајте ги Американците“, нагласи Трамп.

Тој рече дека САД ќе ја направи богата држава, безбедна и повторно голема.