Американскиот претседател Доналд Трамп призна по првпат дека платил повеќе од 100 илјади долари на поранешниот личен адвокат Мајкл Коен, за да ја замолчи порно ѕвездата Сторми Даниелс за нивната врска.

Трамп и негови соработници претходно негираа дека на Даниелс и биле дадени 130 илади долари преку адвокатот Коен, пред претседателските избори во 2016 година, за да не зборува за интимната средба со Трамп во 2006 година, објавуваат американски медиуми.

Документот со признание што го потпиша Трамп, а го објави американската Канцеларија за владина етика, предизвика и коментари меѓу демократите и невладините организации за можно кршење на законот за финансирање предизборни кампањи, а кој бара јавно објавување трошоци за вршење влијание врз избори.

Кон крајот на март, Даниелс во интервју за американската ТВ мрежа Си – Би – Ес признава дека само еднаш имала секс со Трамп во 2006. година, откако се запознале на голф турнир на езерото Тахое.

Даниелс наводно неколку дена пред претседателските избори во ноември 2016 потпишала договор со кој се обврзува да молчи за аферата со Трамп. За тоа, како што наведува добила 130.000 долари. Потоа во јануари годинава потпишала изјава со која негира каква било афера. Но таа изјава како што тврди се покажала дека е невалидна, бидејќи не била потпишана од Трамп.

Таа на 6 март поднела  тужба против претседателот, наведувајќи дека Трамп никогаш не го потпишал договорот со неа за таа да молчи во врска со интимните односи меѓу нив.

Адвокатот на порно ѕвездата Сторми Даниелс, Мајкл Авенати кон крајот на март поднесе барање до судот, претседателот на САД Доналд Трамп да сведочи под заклетва, во врска со тврдењата на неговата клиентка дека имала односи со Трамп пред 12 години.