Специјалниот пратеник на американскиот претседател Доналд Трамп, Стив Виткоф, викендов ќе отпатува за Германија на средба со украинскиот претседател Володимир Зеленски и европските лидери, како дел од новата рунда разговори на високо ниво за завршување на војната, пренесува „Волстрит џурнал“.
Виткоф, кој ги предводи обидите на Белата куќа за посредување меѓу Украина и Русија, во Берлин ќе ја разгледа најновата верзија на предложениот мировен договор. Администрацијата на Трамп притиска договорот да биде постигнат до Божиќ и веќе одржа неколку рунди разговори со украински и руски претставници, иако засега нема знаци дека е можен брз пробив.
Иако сè уште не е официјално потврдено кои европски лидери ќе присуствуваат на разговорите, „Волстрит џурнал“ објави дека на средбата ќе учествуваат британскиот премиер Кир Стармер, францускиот претседател Емануел Макрон и германскиот канцелар Фридрих Мерц.
Потврдата за средбата меѓу Виткоф и Зеленски следува откако Украина им ја предаде на САД ревидираната верзија на мировниот план од 20 точки. Најтешкото прашање во преговорите останува судбината на териториите во источна Украина. Киев одбива да отстапи територија која е нелегално окупирана, додека Москва повторува дека има намера со сила да го преземе целиот регион Донбас доколку Украина не се повлече.