Претседателот Доналд Трамп на заедничката прес конференција во Париз со неговиот домаќин, францускиот претседател Емануел Макрон, навести дека постои шанса „нешто“ да се постигне во врска со Парискиот договор за климатските промени, оставајќи ја така отворена вратата за можност за промена на ставот од договор од кој САД се повлече.
„Нешто би можело да се случи со Парискиот договор, ќе видиме што ќе биде тоа. Ќе разговараме на оваа тема во наредниот период. Ако се случи, ќе биде прекрасно, ако не се случи и тоа ќе биде ок“, рече Трамп.
„Разговаравме за несогласувањата пред Трамп да дојде до одлука во врска со Парискиот договор. Делиме исти погледи за многу теми. Ќе напредуваме заедно. Ќе работиме заедно и моја желба е да продолжам да соработувам со САД“, изјави Макрон на прес конференцијата.
На Трамп неминовно му беше поставено прашањето за избор на директор на Федералното истражно биро (ФБИ) и состанокот на неговиот син со руска адвокатка, нешто што Доналд младиот неодамна го обелодени и се наоѓа во жижата на јавноста последните денови.
„Што се однесува на мојот син, тој е прекрасен млад човек. Се состана со руска адвокатка, не со владин адвокат. Тоа беше краток состанок. Мислам дека сите би прифатиле таков состанок. Тоа се вика истражување на опозицијата. Тоа е стандардно во политиката. Политиката не е најдобра професија на светот. Во случајот на Доналд помладиот, тие разговараа за присвојување, што не беше ни тема на кампањата. Медиумите тоа го преувеличија“, одговори Трамп.