Арсен Венгер, конечно, ги израдува навивачите на Арсенал со звучно име и вносен трансфер. На „Емирати“ го носи сонародникот Александре Лаказет од Олимпик Лион за сума од 50 милиони евра. Напаѓачот, според најавите, се очекува во Лондон најдоцна до среда и по минување на лекарските прегледи да стане и официјално член на „топчиите“.
Голем број од медиумите во Франција и во Англија ја потврдија веста што ја сметаат за завршена работа. Договорот паднал синоќа, откако премиерлигашот решил на првично понудените 45 милиони да додаде уште пет плус одредени бонуси за задоволување на барањето и на клубот од „Жерлан“ за услугите на репрезентативецот на „триколорите“.
Арсенал со ангажманот на Александре Лазакет ќе постави нов клупски рекорд во висина на трансферите што досега го држеше Месут Езил кој пред четири години пристигна од Реал Мадрид за 50 милиони евра.
Досегашниот напаѓач на Лион одамна е желба на Венгер. Најголема негова препорака е процентот на успешност во реализациите (38,9 отсто), а ланската сезона постигна 37 погодоци во 45 натпревари.