Директорот на струшкиот затвор Арменд Шаќири вчера бил разрешен на владината седница по негово барање. Тој пред неколку дена доставил писмо до Владата во кое бара да биде сменет. Експресната смена на Шаќири следува три дена по полициската акција во Струга, во која беа уапсени повеќе лица за продажба на дрога и оружје.
Портпаролот на Владата Мухамед Хоџа не потврди дали повлекувањето на Шаќири од директорската позиција е поврзано со полициската акција во Струга.
„Како Влада не можеме да ги коментираме постапките на другите инситиции како што беше полицсиката акција“ кажа Мухамед Хоџа, портпарол на Владата.
Министерството за внатрешни работи во соработка со ОЈО за организиран криминал и корупција во саботата изврши претрес во просториите на Казнено поправниот дом во Струга и во други локации низ градот и во околината. Беа уапсени шест лица, а еден е во бегство. Еден од уапсените е осуденик кој се барал со потерница за издржување казна затвор од 13 години за ,,Неовластено производство и пуштање во промет на наркотични дроги, психотропни супстанции и прекурсори“.
„Во истрагата е утврдено дека на криминалната група и помагал и инспектор од полициската станица Струга и против него ќе бидат преземени соодветни мерки. Пред постапувањето на полициските служебници, пред затворот во Струга, биле забележани две непознати лица со патничко моторно возило ,,Форд фиеста,, со албански регистарски таблички и при обидот да бидат легитимирани, истите не поседувале документи за идентификација . При прегледот на возилото, пронајдена е марихуана и лицата се приведени“, соопштија од МВР. Од таму додадоа дека „ќе продолжат со истрага за обезбедување материјални докази и за други луѓе за кои полицијата се сомнева дека сториле кривични дела, злоупотреба на службена положба“.
Шаќири беше именуван за директор на струшкиот затвор во мај годинава.