Работилница на тема „Дигитална трансформација, податоци и вештачка интелигенција во Западниот Балкан“ од денеска до сабота ќе се одржи во Скопје. Настанот е во организација на Заедничкиот истражувачки центар на Европската Комисиja, а коорганизатори се Универзитетот „Св. Кирил и Методиј“ во Скопје, Организацијата за храна и земјоделство на Обединетите Нации (FAO) и Глобалното управување со гео-просторни информации на Обединетите Нации (UN GGIM).
На отворањето на работилницата се најавени обраќања на министерот за информатичко општество и администрација Јетон Шаќири, ректорот на УКИМ, Никола Јанкуловски, Карлос Торецила Салинас, шеф на единицата во Заедничкиот истражувачки центар при Европска Комисија, Џулијан Васало, заменик шеф на Делегацијата на ЕУ во Северна Македонија и Трајан Ангелоски, претседател на Сојузот на стопански комори на Македонија.
На тридневниот настан е најавено учество на околу 50 лица од 11 земји.
Целта на работилницата, како што се наведува, е да се утврдат сегашните капацитети и можности на земјите од Западен Балкан за вклучување во остварување на амбициите што ги има Европската Унија, а тоа е да стане водечки светски регион за развој и користење на вештачката интелигенција, која би била етичка и безбедна, а во центарот би бил човекот.